May 24, 2011

البنات عايزين إيـه من الماتشات



واحدة من البنات المشجعات للماتشات وتحديدا كرة القدم, بس فئه وسطى يعني بين المتعصبين والمستجدين
بهتم بماتشات الدوري المصري و كاس الامم وكاس العالم لو ايطاليا بتلعب!
ومع انتشار ظاهرة تشجيع البنات, بقينا نتفرج على الماتشات في الكافيهات
والمشجعات فئات

اشهرهم طبعا المستجدين!
"بتوع: "هوه أحمد حسن حاطط جل في شعره ..زي القمر

واول ما الاعلان يخلص خبطت فـ ودني كلمة: دنتي اللي قمر!
وفيوم من أيام ماتش مصر ومش فاكره مين, وقعت في شلة مستجدين والماتش ابتدى وفضلو ساكتين ولا  كلمه ولا تشجيعه
ولاحد سمعنا زغروتين
وفي اول هجمه خطر على مرمى الوطن انتقذها السد العالي المتين
كلمة "وحش" هزت الكافيه بـ اللي فيه

لكن طبعا المستجدين كان ليهم رأي تاني وهوه
(عصام الحضري.. ده راجل اوي اويييييي)
قولت ومالو ربنا يزيدو ماهو بيحرس مرمى الوطن برضوا

لكن مع اعتراض احدى المستجدين بأن:
 ( زيدان هوه الي يجنن مش شايفه حلاقة شعره)

قولت ودي بقى ارد اقولها ايه...؟ ربنا يجعل في حلاقة شعر راسو البركه
 

في ساعتها سألت نفسي.. هيه البنات بتتفرج عالمتشات عشان أحمد حسن حاطط جل في شعره !!! 
يعني من الاخر.... مالهاش في الكوره

 و ده كان رأي الولاد اللي قالو ان البنات مالهاش في الكوره بس بتشجع ! هيه البرازيل بتكسب من شويه

واجمعوا على ان البنات بتشجع الفرقه اللي فيها اكتر لاعب جاذبيه ولياقه بدنيه وقصة شعره "وهميه" زي ( كريستيانو رونالدو ) كده اللي حكايته حكايه ومجنن العالم وراه والبنات بالتحديد من مانشستر لريال مدريد

...لكن اختلفت وجهت نظر الرجال في المشجعات
القله قالو: ان التشجيع الرياضي فيه خشونه وبيضيع انوثة البنت
لكن الأغلبيه كانو مبسوطين جدا وقالو: ومالو ده حتى تشجيع اليومين دول كلو انوثه

واهو الموزاز بيشجعو واحنا معاهم

اما المتزوجين فا كان ليهم سؤال
(يعني تحضرلي الغدا وتشوف البيت والعيال ولا تتفرج لي على ماتش ايطاليا والبرتغال.....؟)
 ... مش هارُدّ

From عal beach Magazine 2010©

Feb 3, 2011

...رأي محــــــــايد


أعلنت من البدايه انني ضد نظام مبارك ومازلت.. لكني لست ضد مبارك كاشخص
عدم نكراناً للجميل مهما كان أمامه أضعاف من المساوئ

وأيضاً ضد أي إساءه او إهانه لرئيس دولتي ولو أخذاً بمبدأ عدم نشر غسيلنا اللمؤاخذه .. وسخ

و بعد خطاب الرئيس الذي تضمن تحقيق بعض مطالب الشعب مع إكماله فترة الرئاسه والذي رأيت فيه " نص العمى
أصبح دور كل مصري سواء مؤيد او معارض .. الاهتمام بما فيه مصلحة مـصر أولاً ومن ثم سوف تأتي مصلحتنا
ولو ما "أتتش" أهو ميدان التحرير موجود ده إذا مانتهاش على إيد اللي فيه دلوقتي
ودا مش معناه اننا لو شوفنا اللي في مصلحت مصر دلوقتي هنام على خطاب سيادة الريس و يبقى زي كلام الليل المدهون بزبدة

لكن قبل تحقيق مطالبنا يجب أن نوحد صفوفنا لإصلاح مصر
وأن نقف الآن يداً واحده ضد الفتنه و المسيئين لسمعة مصر ولأصحاب المطامع الشخصيه وأي يدّ اخري دخيله علينا
وأولاً وأخيراً الشعب المصري هو المستفاد الوحيد من عم الأمن والأمان في مصر
..ولك الله يا مــصر فيما بعد
____________________________


: سؤال رفيع يراودني


ياترى هايجي يوم وأقول نار مبارك ولا جنة ..........؟

!!! ولاّ ضربوا الاعور على عينه

Sep 21, 2010

!...ماتزوقينـــــــــيش يا ماما


كان ياما كان ومن ايام زمان واغنية "ماتزوقيني يا ماما" الشعار الرسمي للأنتظار العرسان
...و ماما اللي هاتكلم عليها موجوده لحد دلوقتي كمان
اللي اول ما بانوتتها تكبر وتبقى طولها والناس يقولو ياختي عليها وعلى جمالها... عملا نفسها ولا واخده بالها
لحد ماتسمع ماما ان ابن طنط فلانه زينة الرجال... عايز يلبس دبله في ايده اليمين بعدين الشمال
تبتدي بقى توطد العلاقات وتزود الزيارات والمكالمات
وياسلام بقى لو بنت خالتك او بنت الجيران اللي اصغر منك اتخطبت كمان


*لأ ماما كده تبتدي تقلق

 وماتلحقيني يا ماما قوام يا ماما..!
 ده احنا في زمن العريس اللقطه .. اصعب من ان الزمالك ياخد الدوري من الاهلي بنقطه


*وكل العيله بيقولو يـــــــــــارب

 وسيبك من الدراسات والتاريخ ...البنت لو طلعت المريخ اخرتها للطبيخ
!واول مايقرر حبيب ماما ..مامتو تاخد معاد من ماما ويجيلكو هوه و ماما واجارك الله من أبن ماما
جاي يتفرج ويعاين وقبل مايناسب يسأل ويحاسب.. ومش بعيد يخلع قبل الوقت المناسب


*و اهي جات العروسه

 .. وماما بتدعي من قلبها يارب اجعل القبول في وشها
وهي يا حبت عيني كومبارس صامت بيوزع ابتسامات عاللي بيتكلم واللي ساكت
في مشهد بيحكي السيره الذاتيه للعروسين... مع استعراض مبالغ لمهارات الفرقتين

*وميـــــــن يزود

"ويسدل الستار..  ومامته مش صابره تقفل باب العربيه قبل ماتقوله "ايه الأخبار؟؟؟

!!! لااااااااااآ
<<<<<<<<<<<<<<<<<<<<<<<<<<<<<<<<<<<<<<<<<<<<<
هوه انا بايره يا روح ماما... طب ماتزوقنيش يا ماما

Aug 10, 2010

...أهو جـه يا ولاد




كل سنه وانتوا طيبين طبعا استعديتم للشهر الكريم



(وفي ناس جابت الزينه والفوانيس (فانوس أبوتريكه للأهلاويه آه والزملكاويه لأ


(و في ناس جابت البلح والمكسرات والياميش (يا ترى هاتجيبو بلح هيفا ولا نانسي...؟


وفي ناس بتفكر هاتعزم مين وهاتطبخ ايه .. وفي ناس بتفكر هاتتفرج على ايه؟


ماهو التليفزيون استعد هوه كمان وأطلق حملاته الاعلانيه عن مسلسلاته وبرامجه الرمضانيه


اللي محوشهالنا طول السنه عشان يتخمنا بيها في شهر كريم, واحنا مش عاتقين ..نخلص أكل من هنا "ونأنتخ " قداموا من هنا, نخلص ده اللي بعدوا


والوقت عمال يعدي والتراويح خلصت ونقول بعد كده آه الشيطان ابن الايـه ده شاطر


! لااااااا يا شاطر ..الشياطين متسلسله انت ناسي انت في الشهر الكريم


لأ والمسلسلات ربنا لايزيد ولا يبارك ناسيه هيه كمان, وهاتك يا هاشتكه وبشتكه ورقص وشخلعه
و (الحاجه غاده عبد الرازق قصدي الحاجه زهرة ) قايمه بالواجب


ولاّ البرامج... يارب خايّب ظني في البرامج


وماشوفش نفس الضيوف في كل البرامج يمشوا من هنا يطلعوا هنا (وبنفس اللبس) ماهم مش ملاحقين


ولا أشوف دينا الرقاصه في كل البرامج, يعني ايه علاقة دينا ب رمضان والنبي...؟


! أما على جانب آخر في حاجات تانيه شاغله دماغ بعض الناس, أنا بقول "بعض" أهو


اللي شايل هم الصيام وأستغفر الله العظيم الواحد هاينزل الشغل وهوه صايم بقى ومش طايق دبان وشه


! ومش عايز حد "يبؤ" معايا ..اللهم أني صايم, بالمناسبه صحيحها(اني صائم) مرتـين


أنا هاروح أشربلي سجارتين عشان "أزبط" دماغي ماهو الأستاذ: فلان الفلاني (الله.. لايسامحوا بقى) قال ان التدخين لايبطل الصيام


"وطول مانتا ماشي بقى وكل ماتقابل حد تلاقيه مش حافظله غير كلمتين "ياعم أنا صايم


! ولا السواقه تبقى ماشي في أمان الله وتلاقي اللي داخل عليك من هنا ومن هنا ماهو صايم بقى


ولو اتكلمت كلمه..تلاقي رصّت شتايم يختمها ب ماتخلينيش أفطر عليك بقى يعني انزل اطلع "تيـــــــــــت" أهلك.. دي حاجه تفطر يا جدع


الولاد بقى مشكلتهم البنات ولبس البنات واحنا صايمين بقى حرام عليكوا, يعني نغض البصر ازاي دلوقتي؟
 (الراجل بقى يمسك نفسه)


وتيجي البنت ياعيني تتحجب في رمضان يقولك (ظاهرةالحجاب الرمضاني) والحجاب مش لعبه فأيديك


ماتسيبوهم في حالهم أهم بيعملوا اللي عليهم عشان يكملوا صيامهم, ويمكن بعد كده ربنا يكرمهم ويكملوا بيه


بس والنبي يا بنات ويا ستات كمان كملوا صيامكم من غير ما تمسكوا سماعت التليفون من أول ماتصحوا ودي دي دي دييييي... وهاتك يا نميمه


! وفي آخر المكالمه : آه أنا مش عايزه أتكلم عليهم بس عشان أنا صايمه, قولي اللي انتي عايزاه يا "حبيبتشي" بس بعد الفطار


 لكن المشكله الحقيقيه واللي "قطشعت" قلبي.. المتصاحبين


فابيواجهوا ياعيني مشكله عويصه وهيه انهم مابيقدروش يتكلموا ولا يشوفوا بعض طول نهار رمضان عشان "مايبوازوش" صيامهم.. يا حرااام


فابيضطروا انهم يقفلوا مع بعض قبل آذان الفجر (ب ثانيتين) ويرجعوا يتكلموا بعد الفطار


! لكن الناصحين فيهم عندهم حل آخر.. وهوه الشات عالنت, على فكره يا حبايبي النت (خلوه) برضوا


أما اللي مالهومش فيها او اللي ما وراهومش شغله ولا مشغله بيعوضوا تعب الصيام (صيام الجوع طبعا) بالنوم


تلاقي الواحد فيهم سهران للصبح اول مايحس بالجوع ينام مايصحاش الا على آذان المغرب يشحن ويبتدي يومه بقى


!اللهم احفظنا


في النهايه أحب اوجه رساله بخصوص حبايبي الحلوين الصغيرين اللي اول ما ماما تسأل مـين اللي عمل كده 


!تلاقيهم كلهم في نفس واحد : والله مانا يا ماما


يا ماما و يا بابا نبهوا ولادكم وعلموهم في رمضان ان الكدب بيضيع الصيام


شهر رمضان هديه من الله تعالى لنا, فرصه نقرب لربنا ونتوب توبه صادقه.. عسى أن يغفر لنا


ونطلع منه كسبانين.. مش زي مادخلنا فيه نخرج منه


(كما جاء عن رسول الله صلى الله عليه وسلم: (خاب وخسر... من ادرك رمضان ولم يغفر له

Aug 9, 2010

الرمضاني FACEBOOK ..تخيل ال


 شطحت ب خيالي شطحتين لحد ما وصلت للشهر الكريم,
 ودخلت (بخيالي برضوا) عال Facebook ! ده باعتبار ان احنا في رمضان!
 فا لقيت Home page
 أو الصفحه الرئيسيه عامره بالأيمان وذكر الله, واعدت اتفرج عالبروفيلات والحمد لله مالقتش أثر لFacebook الصيف
بتاع Profie pic الفورمه ابو عضلات مفتوله ومايوه
  والبنات وال pose اياه اللي أنا نفسي من هواته...
(وتوب علينا يارب من الصيف وبلاويه واللي بيجرى فيه)
لكن ال Facebook...الرمضاني بقى حاجه تانيه 
حلت صورة فانوس رمضان وصور حمد وشكر الله والصلاة والسلام على رسوله الكريم عليه أفضل الصلاة والسلام, مكان صور الصيف اياها
أما ال Status بقى لقيتها من الأذكار والدعاء والأحاديث الشريفه, وكل واحد كاتب بقى في الجزء الكام وهايختم القرآن كام مره ومافيش أحلى من كده كلام  
و لينكات الصيف من ميكسات وألبومات جديده وحفلات فاختفت تماما وحل محلها لينكات تنوعت مابين القرآن الكريم والأدعيه المأثوره وحلقات البرامج الدينيه (رحله للسعاده مع عمرو خالد - خواطر 5 مع أحمد الشقيري - مدرسة الحب مع مصطفى حسني - الطريق الصح مع معز مسعود - [ونهاية العالم و مسافرن 5 ورحلة حياه لفضيلة الشيخ محمد العريفي]
اللي بتميز تليفزيون الشهر الكريم عن باقي السنه, ده غير الأغاني الدينيه اللي أعدها مطربيها مخصوص لهذا الشهر واللي بنستبدلها بالأغاني بتاعتنا عشان الشهر.
أما عن ال Notes فا ليها دور مؤثر جدا في نشر القصص والحكم والمواعظ الدينيه, والواجبات والنواهي والمحظورات اللي تهم كل مسلم  
وال Applications أغلبها كان دعاء اليوم ومن أقوال الرسول صلى الله عليه وسلم  
ده غير ال Invitations اللصفحات والجروبات الدينيه وال Events اللي على ودنه   
 يعني ال Facebook  الرمضاني ده بيعينك على ذكر الله والدعوه في سبيله وحاجه تشرح القلب
ومع ذلك برضوا توقعت اننا هانخف ايدنا من عليه عن العادي عشان أغلبية الوقت هانكون مشغولين بالصلاه وقراءة القرآن والعبادات!... مع شوية كنافه وقطايف وحلويات, ومسلسلات!
وكل سنه وانتم طيبين ورمضان كريم.. وال Facebook برضوا كريـــــــــــــــم